ޕޯޓުތަކަށް ގާތްކުރާ އޮޑިފަހަރުން ނަގާ ސްޓީވެޑޯރިންގް ފީ ޑޮލަރުން ނަގަން ފެށިނަމަވެސް ބާޒާރުގައި މުދަލުގެ އަގު ބޮޑުވާންޖެހޭ ސަބަބެއް ނެތްކަމަށް މޯލްޑިވްސް ޕޯޓްސް ލިމިޓަޑް (އެމްޕީއެލް) އިން ބުނެފިއެވެ.
ސްޓީވެޑޯރިންގް ފީ އަކީ ރާއްޖޭގެ ޕޯޓުތަކަށް ގާތްކުރާ އޮޑިފަހަރަށް މުދާ އަރުވާއިރާއި ބާލާއިރު މޯލްޑިވްސް ޕޯޓްސް ލިމިޓެޑުން ނަގަމުން އަންނަ ފީއެކެވެ. މީގެ ކުރިން ދިވެހި ފައިސާއިން ސްޓީވެޑޯރިންގް ފީ ދެއްކުނު ނަމަވެސް، އެމްޕީއެލްއިން މި މަހުގެ ފުަރަތަމަ ދުވަހުން ފެށިގެން ސްޓީވެޑޯރިންގް ފީ ޑޮލަރުން ނަގަން ވަނީ ފަށާފައެވެ.
ސްޓީވެޑޯރިންގް ފީގެ ކޮންޓެއިނާ ރޭޓުތައް:
- 20 ފޫޓުގެ ކޮންޓެއިނާ – 195 ޑޮލަރު
- 40 ފޫޓުގެ ކޮންޓެއިނާ – 211 ޑޮލަރު
"އިޤްތިސާދީ ނަޒަރަކުން ބަލާއިރު ދިވެހިރާއްޖޭގައި ހިފެހެއްޓެން އޮތް ޑޮލަރުގެ އާމްދަނީއެއް އޮތީ ބޭނުންނުހިފި." އެ ކުންފުނިން ބުނެފައިވެއެވެ.
ބޯޓު ފަހަރުން ނަގާ ފީ ޑޮލަރުން ނަގާގޮތަށ ްބަދަލުކުރުމާއި ގުޅިހެން ދިވެހި ވިޔަފާރިވެރިން މުދާ އެތެރެކުރަން ކުރާ ހޭދަ ބޮޑުވެ، ބާރާޒުގައި މުދަލުގެ އަގު ބޮޑުވެދާނެކަމުގެ ކަންބޮޑުވުންތައް ބައެއް ވިޔަފާރިވެރިންނާއި އާންމުންވެސް ވަނީ ފާޅުކޮށްފައެވެ.
ނަމަވެސް ކަނޑުމަގުން މުދާ އެތެރެކުރުމުގެ މަރުހަލާތަކަށް ބަލާއިރު އެ ބަދަލާއެކު ބާޒާރުގައި މުދަލުގެ އަގު ބޮޑުވާންޖެހޭ ސަބަބެއް ނެތްކަމަށް އެމްޕީއެލްއިން ވަނީ ބުނެފައެވެ.
"ދިވެހިރާއްޖެއަށް ކަނޑުމަގުން މުދާ ގެންނަ ދިވެހި ވިޔަފާރިވެރިން ރާއްޖޭން ބޭރުގައި ހުންނަ މުދާ ފޮނުވާ ފަރާތަށް ސީ.އައި.އެފް ޓާރމްގައި މުދަލުގެ އަގާއި ފްރައިޓް އަށް ވާ ފައިސާ ފޮނުވާއިރު، މީގެ ތެރޭގައި ޝިޕް އެޖެންޓުން އެމްޕީއެލްއަށް ދައްކަންޖެހޭ ފީތައްވެސް ހިމެނޭ. މި ފައިސާ ދިވެހި ވިޔަފާރިވެރިޔާ ރާއްޖޭން ބޭރުގައި ހުންނަ މުދާ ފޮނުވާ ފަރާތަށް ދައްކަނީ ޑޮލަރުން. އެހެންކަމުން، އެ މުދާ ރާއްޖެ ގެންނަން ބޯޓަށް އަރުވާއިރުވެސް، ދިވެހި ވިޔަފާރިވެރިޔާ ވަނީ އެމްޕީއެލް އަށް ދައްކަންޖެހޭ ފައިސާވެސް ޑޮލަރުން ދައްކައިފަ. ބޯޓް އޮޕަރޭޓް ކުރާ ޝިޕް އޯނަރުން ރާއްޖޭގައި ހުންނަ އޭޖެންޓަށް އެ ފައިސާ ޑޮލަރުން ފޮނުވިޔަސް އެ ފައިސާ އެމްޕީއެލް އަށް ދައްކަނީ ދިވެހި ރުފިޔާއިން. ކަޅު ބާޒާރުގައި އަގުބޮޑުކޮށް ޑޮލަރު މާރުކުުރުމަށް ފަހު އެމް.ޕީ.އެލްއަށް ބޭންކް ރޭޓްގައި ފައިސާ ދައްކައިގެން ގިނަ ފަހަރު އޭގެ ފައިދާ ނަގަނީ އެޖެންޓުން." ކަން ހިނަގމުން ދިޔަ ގޮތް ބަޔާންކޮށް އެމްޕީއެލްއިން ބުނެފައިވެއެވެ.
އެކުންފުނިން ބުނީ ޝިޕް އެޖެންޓުން ފައިސާ ދެއްކުމުގައި އެ ބަދަލު އައި ނަމަވެސް، ދިވެހި ވިޔަފާރިވެރިން މީގެ ކުރިޔާ އެއްގޮތަށް އެމްޕީއެލް އިން ހޯދާ ޚިދުމަތްތަކަށާއި ބަނދަރުން މުދާ ނެރުމަށް ދައްކަމުން ދިޔަ ހުރިހާ ފައިސާއެއް ދައްކަމުންދާނީ ހަމަ އެއްވެސް ބަދަލަކާ ނުލައި ދިވެހި ރުފިޔާއިންކަމަށެވެ.
