އީރާނުން އިސްރާއީލަށް ދެމުން ގެންދާ ހަމަލާތައް ދިފާއު ކުރައްވާ އެ ޤައުމުގެ ދިފާއުގައި ކުރީގެ ރައިސް މައުމޫން އަބްދުލް ގައްޔޫމް މަރުހަބާ ވިދާޅުވެ ވާހަކަފުޅު ދައްކަވައިފިއެވެ.
ރައީސް މައުމޫން އެކްސްގައި ކުރެއްވި ޕޯސްޓެއްގައި ވިދާޅުވީ އިސްރާއީލުގެ އަނިޔާވެރިކަމާއި ދެކޮޅަށް އަމިއްލަ ދިފާއުގައި އީރާނުން އެޅި ފިޔަވަޅަށް އެމަނިކުފާނު ވަރަށް ހޫނު މަރުހަބާއެއް ދަންނަވާކަމަށެވެ.
I warmly welcome the powerful action taken in self defence by Iran last night against Israeli aggression. May Allah Almighty grant victory to the courageous Iranian and other Muslim fighters!
— Maumoon Abdul Gayoom (@maumoonagayoom) April 14, 2024
"ހިތްވަރުގަދަ އީރާނާއި އެހެނިހެން މުސްލިމް ހަނގުރާމަވެރިންނަށް މާތް الله ތަޢާލާ ނަޞްރު ދެއްވާށި!" މައުމޫން ވިދާޅުވެފައިވެއެވެ.
މައުމޫނަކީ ރާއްޖޭގެ ރައީސްކަމުގައި ހުންނެވިއިރު ވެސް އިސްރާއީލާ ދެކޮޅަށް ވަރަށް ގިނަ މަސައްކަތްޕުޅުތަކެއް ކުރެއްވި ބޭފުޅެކެވެ. އެގޮތުން ރާއްޖެއާއި އިސްރާއީލާ ދެމެދު އޮތް ސިޔާސީ ގުޅުން ކަނޑާލައްވާ ފަލަސްތީނާއެކު ގާތް ގުޅުމެއް ވަނީ ގެންގުޅުއްވާފައެވެ.
އީރާނުން އިސްރާއީލަށް ޑްރޯނާއި މިސައިލުން ހަމަލާތައް ދޭން ފެށީ ސީރިއާގެ ދިމިޝްގުގައި ހުންނަ އީރާންގެ ކޮންސިއުލޭޓަށް އިސްރާއީލުން ދިން ހަމަލާގައި އީރާންގެ ރިވޮލިއުޝަނަރީ ގާޑުގެ ކޮމާންޑަރަކާއި އިތުރު ބައެއް ސިފައިން މަރާލުމާ ގުޅިގެން އެކަމުގެ ބަދަލު ހިފުމުގެ ގޮތުންނެވެ.
އީރާނުން އިސްރާއީލަށް ޙަމަލާދީފައި މިވަނީ ޞަޙްޔޫނީ އިސްރާއީލުން ފަލަސްތީނުގެ ޣައްޒާގައި ކުރަމުން އަންނަ ފަނާކުރަނިވި ހަނގުރާމައަށް ހަ މަހަށް ވުރެ ގިނަ ދުވަސްވެ، ފަލަސްތީނުގެ 33،000 އަށް ވުރެ ގިނަ މީހުން މަރުވެ، ވަށާލެވިފައިވާ ސަރަހައްދު ބަނޑުހައިހޫނުކަމުގެ ތެރެއަށް ވެއްޓިފައިވާ ދަނޑިވަޅެއްގައިކަން ފާހަގަކޮށްލެވެއެވެ.
