އާދިއްތަ ދުވަހު ބޭއްވި ރައްޔިތުންގެ މަޖިލީހުގެ އިންތިހާބުގައި ނޮޅިވަރަމް ދާއިރާއަށް އަމިއްލަ ގޮތުން ވާދަކުރައްވާ އިންތިހާބު ކާމިޔާބު ކުރެއްވި މުހައްމަދު ރަޝީދު (ރަޝީދުބެ)، ސަރުކާރު ހިންގާ ޕީއެންސީއަށް ސޮއިކޮށްފިއެވެ.
އެކަން ހާމަކޮށްފައިވަނީ ޕީއެންސީން ކުރި ޓްވީޓެއްގައެވެ.
ނޮޅިވަރަމް ދާއިރާގެ ނަތީޖާއަށް ބަލާއިރު 5 ކެންޑިޑޭޓުން އިންތިޚާބުގައި ވާދަކުރެއްވިއެވެ. ދާއިރާގެ މިހާރުގެ މެމްބަރު މުޙައްމަދު ނަޝީދު ޢަބްދުﷲ (މޮސްޓާ) ވެސް ވާދަކުރެއްވި މިއިންތިޚާބުން 426 ވޯޓާއެކު މޮސްޓާއަށް ލިބިވަޑައިގަތީ 3 ވަަނައެވެ. 722 ވޯޓާއެކު 69 ވޯޓުން ކުރިހޯއްދަވައިގެން އިންތިޚާބު ކާމިޔާބުކުރައްވާފައިވަނީ އަމިއްލަ ގޮތުން ވާދަކުރެއްވި މުޙައްމަދު ރަޝީދު (ރަޝީދުބެ) އެވެ. ޕީއެންސީގެ ކެންޑިޑޭޓު އަޙްމަދު އަޝްރަފަށް ލިބިވަޑައިގަތީ 2 ވަނައެވެ. އެމްޑީޕީގެ ކެންޑިޑޭޓު ޢަލީ ޢަބްދުއްރަޙްމާނަށް 4 ވަނަ ލިބިވަޑައިގަތްއިރު، ޖޭޕީ ގެ ކެންޑިޑޭޓު މުޙައްމަދު ޝަހުދީއަށް ލިބިވަޑައިގަތީ 5 ވަނައެވެ.
19 ވަނަ މަޖިލީހުގެ އިންތިހާބުގައިވެސް ރަޝީދުބެ ވާދަކުރިއެވެ. އެ އިންތިހާބުގައި އަށް ކެންޑިޑޭޓުންނާ ވާދަކޮށް ރަޝީދުބެއަށް ލިބުނީ 2 ވަނަ އެވެ.
ނޮޅިވަރަމް ދާއިރާގެ އިންތިހާބީ މެންބަރު ޕީއެންސީއަށް ސޮއިކޮށްފައިވާއިރު ސަރުކާރުގެ ތާއިދާއެކު އަލަށް މަޖިލީހަށް އިންތިހާބުވި ހަ މެންބަރުން ވަނީ މިއަދު ޕީއެންސީއާ ގުޅިފައެވެ. އެއާ އެކު ސަރުކާރު މެންބަރުންގެ އަދަދު މިހާރު ވަނީ 77 އަށް އަރާފައެވެ.
