މިހާރު ރާއްޖޭގައި ހިންގަމުންދާ ޔޫތް ސެންޓަރުތައް ހުރީ އެންމެ ކުރީގެ މޮޑެލްގައި ކަމަށާއި، އާ ޔޫތް ސެންޓަރުތައް ވެގެން ދާނީ ދިވެހި ޒުވާނުން އެދޭ ފެންވަރުގައި ޤާއިމު ކުރެވިގެންދާ ތަންތަން ކަމަށް ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވަޒީރު، އިބްރާހިމް ވަޙީދު (އަސްވާޑް) ވިދާޅުވެއްޖެއެވެ.
"އެހެން ނަމަވެސް މިހާރު ރައީސުލްޖުމްހޫރިއްޔާގެ އިސްނެންގެވުމާއި އެއްކޮށް އަލަށް ތިޔަ ބޭފުޅުންނަށް ލިބިވަޑައިގަންނަވާ ޔޫތު ސެންޓަރުތައް އަޅުގަނޑު ޤަބޫލު ކުރާގޮތުގައި ދިވެހި ޒުވާނުން އެދޭ ފެންވަރުގައި ޤާއިމު ކުރެވިގެންދާއިރު، ވަޒީފާގެ އިތުރު ފުރުސަތުތައް މިތަނުގައި ފަހިވެެގެން". ވަޒީރު ވިދާޅުވިއެވެ.
އޭނާ ވިދާޅުވީ، މިވަގުތު ޔޫތު ސެންޓަރެއްގައި އެންމެ ބޭފުޅަކު ހުރި ކަމުގައިވިޔަސް، ރަނގަޅު ފެސިލިޓީސްތަކާއެކު އަލުން ޔޫތު ސެންޓަރުތައް ޤާއިމު ކުރެވިގެންދާނީ ރަނގަޅު ވަޒީފާތަކާއިވެސް އެކުގައި ކަަމަށެވެ. އަދި އެވަޒީފާތަަކަކީ ދާއިމީ ވަޒީފާތަކަކަށް ވެގެން ދާއިރު، ޒުވާނުންނާއި އެއްކޮށް މަސައްކަތް ކުރެވި، ރަނގަޅު ޖީލެއް ޤާއިމުކުރުމަށްޓަކައި އެހީވެދޭ ސެންޓަރުތަކަކަށް މި ސެންޓަރުތައް ވެގެންދާނެކަން ޔަގީން ކުރެވޭ ކަމަށެވެ.
