ހުޅުމާލޭ ސެންޓްރަލް ޕާކުގައި މި ރޭ ހަވާ އެރުވުމަށް ހަމަޖެހިފައިވާކަމަށް އެމްއެންޑީއެފުން ބުނެފިއެވެ.
އެ މުއައްސަސާއިން އެކްސްގައި ކޮށްފައިވާ ޕޯސްޓެއްގައި ބުނީ ސެންޓްރަލް ޕާކުގައި ހަވާ އަރުވާނީ ކުޑަކުދިންގެ ދުވަހުގެ މުނާސަބަތުގައި ބާއްވާ "އުފާ ފެސްޓިވަލު" ގައި މިރޭ 10:00 ގައި ކަމަށެވެ.
ސިފްކޯއިން ވިޔަފާރި އުސޫލުން ކުރިއަށްގެންދާ މި ހަރަކާތް ކުރިއަށްދާނީ 3 މިނެޓް ހާއިރަށް ކަމަށްވެސް އެމްއެންޑީއެފުން މައުލޫމާތުދެއެވެ.
އުފާ ފެސްޓިވަލަކީ ޤައުމީ ކުޑަކުދިންގެ ދުވަސް ފާހަގަކުރުމަށްޓަކައި އިޖުތިމާޢީ އަދި އާއިލީ ތަރައްގީއާ ބެހޭ ވުޒާރާގެ އިސްނެގުމުގެ މަތިން ހުޅުމާލެ ސެންޓްރަލް ޕާކުގައި 2 ދުވަހުގެ މުއްދަތަށް ކުރިޔަށް ގެންދާ ފެސްޓިވަލެކެވެ.
މި ފެސްޓިވަލް ބާއްވަނީ އާއިލީ ތަރައްގީއާ ބެހޭ ވުޒާރާއާއި ހުޅުމާލޭ ޑިވެލޮޕްމެންޓް ކޯޕަރޭޝަނާއި އުރީދޫ މޯލްޑިވްސް ގުޅިގެންނެވެ. ފެސްޓިވަލް ކުރިއަށްދަނީ މިމަހުގެ 10 ވަނަ ދުވަހާއި 11 ވަނަ ދުވަހުގެ ހަވީރު 4 އިން 6 އަށާއި ރޭގަނޑު 8 އިން 10 އަށެވެ.
