ތަމްރީނު ލިބިފައި ނުވާ ބަންގްލަދޭޝް މަސައްކަތް ތެރިން ގެނައުމަށް ހުއްދަ ދޫކުރުން ހުއްޓާލީ ބައެއް ކުންފުނިތަކުން ސައްޙަ ނޫން ލިޔެކިއުންތައް ހުށަހަޅާތީ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ބުނެފިއެވެ.
މިކަމާއި ގުޅިގެން ރާއްޖޭގެ މީޑިއާ އަކަށް މައުލޫމާތު ދެއްވަމުން އެ ވުޒާރާއިން ބުނީ، ތަމްރީންލިބިފައި ނުވާ ބަންގްލަދޭޝް މަސައްކަތްތެރިންނަށް ކޯޓާ ދޫކުރުން ހުއްޓާލިތާ މިހާރު މަހެއްހާ ދުވަސް ވެދާނެ ކަމަށެވެ. އަދި ކޯޓާ ދޫކުރުން ހުއްޓާލީ ބައެއް ކުންފުނިތަކުން ސައްޙަ ނޫން ލިއެކިއުންތައް ހުށަހަޅައިގެން މީހުން އެތެރެކުރާކަން ފާހަގަ ކުރެވިގެން ކަމަށް ވެސް އެ ވުޒާރާއިން ބުންޏެވެ.
އެހެންވެ، މިމައްސަލަ އެވުޒާރާއިން ބަލަމުންދާ ކަމަށާއި، އަދި ކޯޓާ އަލުން ދޫކުރަން ފަށާނީ އެތަހުޤީޤު ނިމުމަށް ފަހު ކަމަށެވެ. ނަމަވެސް އެކަމުގެ އިތުރު ތަފްސީލެއް އެ ވުޒާރާއިން ހާމައެއް ނުކުރައްވައެވެ.
ތަމްރީނު ލިބިފައި ނުވާ މަސައްކަތްތެރިން ބަންގްލަދޭޝްއިން ގެނައުމުގެ ހުއްދަ ދިނުން ނިމިދިޔަ ސަރުކާރުން ހުއްޓާލީ 2019 ވަނަ އަހަރުއެވެ. އޭގެ ފަހުން 2020 ވަނަ އަހަރު ޤާނޫނަށް ގެނައި އިސްލާހެއްގެ ތެރެއިން ރާއްޖޭގައި ލޭބަރުންގެ ގޮތުގައި މަސައްކަތްކުރުމަށް އެއް ޤައުމަކުން އެންމެ ގިނަވަގެން އެތެރޭވެވޭނީ 1 ލައްކަ މީހުން ކަމަށް ކަނޑައެޅިއެވެ. އޭގެ ފަހުންވެސް 1 ލައްކައަށްވުރެ ގިނަ ބަންގްލަދޭޝް މަސައްކަތްތެރިން ތިބި ކަމަށް ބުނެ އިތުރަށް ހުއްދަ ދޫ ނުކުރެއެވެ.
އޭގެފަހުން މިސަރުކާރުން ވެރިކަމާ ހަވާލުވުމަށް ފަހު ޤަވާއިދާއި އެއްގޮތަށް އަދި ޤަވާއިދާ ޚިލާފަށްވެސް އުޅެމުންދާ ބަންގްލަދޭޝް މަސައްކަތްތެރިންގެ ސާފު އަދަދު ކަށަވަރު ކުރިއެވެ. އެގޮތުން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙުސާނު އޭރު ވިދާޅުވީ ރާއްޖޭގައި އޭރު ތިބީ ބަންގްލަދޭޝްގެ، 90624 މަސައްކަތްތެރިންކަމަށެވެ.
ހުއްދަ ދޫކުރަން ފެށި ފަހުން މާރިޗު މަހު މަޖިލީހުގައި ވަޒީރާއި ކުރެވުނު ސުވާލަކަށް ޖަވާބު ދެއްވަމުން ވަޒީރު ވިދާޅުވީ، އޭގެ ފަހުން 4000 އެއްހާ ބަންގްލަދޭޝް މަސައްކަތްތެރިން ރާއްޖެ އެތެރެވެފައިވާ ކަމަށެވެ.
ބިދޭސީންގެ މައްސަލަ އަކީ ރާއްޖެއަށް ދިމާވެފައިވާ ވަރަށް ބޮޑު މައްސަލައެކެވެ. ކޮންމެ ސަރުކާރަކުން ވެސް މި މައްސަލަ ހައްލު ކުރުމަށް މަސައްކަތް ތަކެއް ކުރެއެވެ.
