އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އަށް ކުރިޔަށް އޮތީ ވަރަށް އުޖާލާ މުސްތަޤުބަލެއް ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
އައިޔޫއެމްއަށް 45 އަހަރު ފުރުމުގެ ޙަފްލާގައި ބައިވެރިވެވަޑައިގެން ދެއްކެވި ވާހަކަފުޅުގައި ޑރ. ޝަހީމް ވިދާޅުވީ ރައީސް ޑރ. މުޙައްމަދު މުޢިއްޒުގެ މެނިފެސްޓޯގެ ދަށުން އިސްލާމިކް ޔުނިވާސިޓީ އިތުރަށް ފުޅާކޮށް ތަރައްގީ ކުރުމަށް އިސްކަމެއް ދެއްވާ ކަމަށާއި އައިޔޫއެމްއަށް އޮތީ އުޖާލާ މުސްތަޤުބަލެއް ކަމަށެވެ.
"އައިޔޫއެމްއަށް އޮތީ ވަރަށް އުޖާލާ މުސްތަޤްބަލެއް، އެންމެ އުއްމީދު ކުރާ ދުވަހަކީ އައިޔޫއެމްއަކީ ބައިނަލްއަޤްވާމީ ގޮތުން ފާހަގަކޮށްލެވޭ އިސްލާމިކް ޔުނިވާސިޓީއަކަށް ވެގެންދާ ދުވަސް." ޝަހީމް ވިދާޅުވިއެވެ.
ވަޒީރު ވިދާޅުވީ އިސްލާމިކް ޔުނިވާސިޓީއަކީ ވަރަށް މުޙިއްމު މުއައްސަސާއަކީ ވަރަށް މުޙިންމު މުއައްސަސާއެއް ކަމަށާއި، ދައުލަތުގެ ކަންކަން ނިނމުމުގައި އިސްލާމިކު ޔުނިވާސިޓީ އިން ކިޔެވި ދަރިވަރުން އިސް ސަފުގައި ހަރަކާތްތެރިވާތަން ފެންނަ ކަމަށެވެ. އަދި އިސްލާމިކް ޔުނިވާސިޓީ ނުވަތަ މައުހަދު ޤާއިމްވެގެން ދިޔަކަން އެއީ ދިވެހިންނަށް ލިބިގެންދިޔަ ވަރަށް އަގުހުރި ފުރުސަތެެއް ކަމުގައި ވަޒީރު ވަނީ ވިދާޅުވެފައެވެ.
ހަމައެއާއެކު މިއީ ރާއްޖޭގެ އިސްލާމީ ސަޤާފަތް ދެމެހެއްޓުމާއި ނެގެހެއްޓުމަށް އެޅިގެންދިޔަ ވަރަށް ރަނގަޅު ފިޔަވަޅެއްކަން ވަޒީރު ވަނީ ފާހަގަކުރައްވާފައެވެ.
އައިޔޫއެމްގެ ކުރިއެރުމަށް އިސްލާމީ ކަންތައްތަކާ ބެހޭ ވުޒާރާއިން ދޭން ޖެހޭ އެންމެ ފުރިހަމަ އެއްބާރުލުން އަބަދުވެސް ދެއްވާނެކަމުގެ ޔަޤީންކަން ޑރ ޝަހީމް ވަނީ ދެއްވާފައެވެ. އަދި ރާއްޖޭގައި އިސްލާމީ ޙިދާޔަތު ދަމަހައްޓަން އިސްލާމީ ޔުނިވާސިޓީއަކީ މުހިއްމު މުއައްސަސާ އެއް ކަމަށްވެސް ވަނީ ވިދާޅުވެފައެވެ.
