ރައްޔިތުންގެ ފައިސާއިން ވައްކަންކުރާއިރު ރައްޔިތުން އިންތިޚާބުކުރި މެންބަރުން ތިބީ މަންމަނު ވެފައިކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.
އެކްސްގައި ކުރައްވާފައިވާ ޕޯސްޓެއްގައި ޢައްބާސް ވިދާޅުވީ، ރައްޔިތުންގެ ޓެކްސް ފައިސާއިން ހުއްޓުމެއް ނެތި ބޮޑެތި ވައްކަންތައް ކުރަމިން ދާއިރު ރައްޔިތުން އިންތިޚާބުކުރި މެންބަރުން ތިބީ މަންމަނު ވެފައި ކަމަށާއި، އެއީ ގައުމަށް ގައްދާރުވުންކަމަށެވެ.
ސަރުކާރު ހިންގާ ޕީއެންސީގެ ބައިވެރިއެއްކަމަށްވާ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގެ ނައިބު ރައީސްގެ މަޤާމުގައިވެސް ހުންނެވި ޢައްބާސް ކުރެއްވި ޕޯސްޓްގައި ވަނީ ރައީސް މުޢިއްޒަށް ވަރަށްބޮޑަށް ފާޑުވިދާޅުވެފައެވެ. އެގޮތުން، ރައްޔިތުންގެ ފަޅީގައި ކަމަށް ވިދާޅުވެ ރައްޔިތުންގެ ބަނޑަށްޖެހޭނެ ހުރިހާކަމެއް ކުރައްވައިފިކަމަށާއި، ވިޔަފާރިވެރިންވެސް އިނދަޖައްސާލައިފިކަމަށް ވަނީ ވިދާޅުވެފައެވެ.
Thiman manikfaan mihuree rayyithun ge falheega kamah bune rayyithun Bodah jeheyne Haa kameh koh,viyafaariverin thah idha jassaalun noon kameh nukure..rayyithun ge tax faisaain huttumeh nethi bodethi vahkan Thah kuramun Dhaairu rayyithun inthihaabu kuri memberun mammanu vefa…
— Mohamed Abbas (@Abbasvelidhoo) November 14, 2024
މި ޕޯސްޓްގެ އިތުރުންވެސް ވަރަށް ގިނަ ޕޯސްޓްތައް ޢައްބާސްވަނީ އެކްސްގައި ކުރައްވާފައެވެ. ހުރިހާ ޕޯސްޓެއްވެސް ކުރައްވާފައިވަނީ ސަރުކާރަށް ފާޑުވިދާޅުވުމުގެ ގޮތުންނެވެ.
އެގޮތުން ކުރައްވާފައިވާ ޕޯސްޓެއްގައި ސިޔާސީ މަގާމު ތަކުގައި ތިބި 248 މީހުން ވަޒީފާއިން ވަކި ކުރަން ނިންމެވިކަން އިޢްލާންކުރުމަށްފަހު އެކަންވެސް ނުކުރައްވާކަމަށާއި، ދަޢުލަތައް ލިބޭހާ ހުރިހާ ފައިސާއެއް ހޭދަކުރައްވަނީ ސިޔާސީ މީހުންނަށް މުސާރަދިނުމަށްކަމަށް ވަނީ ވިދާޅުވެފައެވެ.
