އެޗްއާރުސީއެމްގެ ނައިބު ރައީސްގެ މަގާމަށް މުއުމިނާ އާދަމް މިއަދު އައްޔަނު ކުރައްވައިފި އެވެ.
އެ މަޤާމަށް މުއުމިނާ އައްޔަނުކުރުމަށް މަޖިލީހުން ރުހުން ދިނީ މި މަހުގެ 20 ވަނަ ދުވަހު އެވެ.
އެޗްއާރުސީއެމްގެ މެމްބަރު ކަމަށް މުއުމިނާ އައްޔަންކުރައްވާފައިވަނީ 2020 ވަނަ އަހަރުގެ ސެޕްޓެމްބަރު މަހުގެ 8 ވަނަ ދުވަހު އެވެ. އޮސްޓްރޭލިއާގެ ޔުނިވާސިޓީ އޮފް ސިޑްނީން ހިއުމަން ރައިޓްސް އެންޑް ޑިމޮކްރަޓައިޒޭޝަންއިން މާސްޓާސް ހާސިލުކުރައްވާފައިވާ މުއުމިނާ ވަނީ އިކޮނޮމިކް މިނިސްޓްރީގެ އިތުރުން ޓްރީޓޮޕް ހޮސްޕިޓަލުގައި ވެސް މީގެ ކުރިން މަސައްކަތް ކުރައްވާފަ އެވެ.
އެޗްއާރުސީއެމްގެ މެމްބަރަކަށް ވެވަޑައިގެންނެވުމުގެ ކުރިން، އެ ކޮމިޝަނުގެ އެސިސްޓެންޓް ރިސާޗް އޮފިސަރުގެ މަގާމާއި ޕްލޭނިން އޮފިސަރުގެ މަގާމާއި ކޯޕަރޭޓް އެފެއާޒް ޑިޕާޓްމެންޓުގެ ޑިރެކްޓަރުގެ މަގާމު ވެސް އަދާކުރައްވާފައިވެ އެވެ.
އެޗްއާރުސީއެމަށް ނައިބަކު އައްޔަންކުރަން މަޖިލިހަށް ނަން ފޮނުވާފައިވަނީ އެ ކޮމިޝަނުގެ ކުރީގެ ނައިބު ރައީސް ޑރ. އަހުމަދު އަދުހަމް އަބްދުﷲ އިސްތިއުފާދެއްވުމުންނެވެ.
